Guardia

Guardia Erdi Aroko hiribildua Arabako Errioxako hiriburua da. X. mendean sortu zen, Nafarroako Erresumaren defentsa gisa, eta Erdi Aroko trazadura ia osorik mantentzen du. Hori dela-eta, kale harriztatuetan, harresietan eta armarridun etxeetan ibiltzeak denboran zehar bidaiaraziko zaitu.

Nabarmengarria da, euskal artearen bitxi gisa, Erregeen Andre Mariaren eliza, baita haren arkupe polikromatua ere (tenplu horren aztarna zaharrenak XII. mendekoak dira); hori bezain itzela da, bestalde, San Joan Bataiatzailearen eliza, arte erlijiosoko pieza interesgarriak dituena, hala nola erretaula nagusia, pieza barroko ikusgarri bat.

Guardiako kaleak eraikin bikainez beteta daude: Erdi Arokoak, errenazentistak, barrokoak eta neoklasikoak. Horien artean, XIV. mendeko Primicia Etxea nabarmentzen da, hiribilduko eraikin zibil zaharrena.

Eta hori gutxi iruditzen bazaizu, Guardia bodegaz beteta dagoenez, ez zaizu zaila izango hori egiaztatzea ostalaritza-establezimenduren bateko sotoak bisitatuz. Ardoa da Guardiaren bizitza eta historia markatu duen produktua eta, beraz, Guardiako ardoa probatu behar duzu.

Ez ahaztu La Hoya historiaurreko herria edo Barbacana urmael zeltiberiarra bisitatzea.

Eta gehiago jakin nahi baduzue landare horiei (mahatsondoak), haien fruituei (mahatsak) eta horietatik ateratzen den zuku hartzituari (ardoa) buruz, Villa Lucía Ardoaren Zentro Tematikoa da zuentzako lekua. Museoa ez da estatikoa, ardoa ikusi, ikasi, usaindu eta edaten baita bertan. Hori bai, aprobetxatu azken zurrutadak, Guardiarekin eta Arabako Errioxarekin duzun maitasun-harremana amaitzen ari baita.